放蛇直擊 Talk騷炒舊橋仆直 阿蘇發晦氣：空櫈多過籮柚

經歷過乳癌折磨， 08年靠《蘇 Good》翻生的蘇施黃，最近開 talk教人點賺兩億。 10月初她在九龍圓方戲院噏足 45場，可惜在零宣傳下，平均入座率只得一成多。


好食就話翻尋味，但阿蘇偏要再煮冇米粥。今次大院搬細院，上周四於 UA時代廣場再度開壇，搞 20場「我要賺兩億——潛能篇」講座，每張飛
100蚊。記者周一（ 11月 29日）放蛇直擊，年屆
55歲的阿蘇全程七情上面，可惜她只將講過無數次的撒哈拉體驗循環再噏，所有賺錢心得統統冇影。當晚得十零個觀眾捧場，難怪阿蘇臨完場亦忍唔住發晦氣：
「空櫈多過籮柚！」


阿蘇的一粒鐘真人騷於每晚七點開 talk，記者於周一提早半小時到達戲院大堂，發現觀眾少得可憐。


Talk騷準時開波，全院 170個座位最後只得 11人捧場，入座率僅約
5%，銷情慘淡。鬧人唔使本的阿蘇罕有親民，全場冇窒過任何一位觀眾，她開口即說：「今日我哋講潛能篇，比目標篇更加難講，因為潛就係潛咗落底，我哋睇唔
到。」她隨即在白板上畫了海、船和冰塊，將潛能比喻為肉眼見唔到的海底，「解釋得唔清楚呀？係咪好聰明呀？你哋一嚿水用完喇！ bye
bye！」雖然她戳力講笑，可惜全場靜過鬼。

觀眾反應冷淡，不過收得錢，阿蘇都要咬緊牙關，將自己在 04年患乳癌前出發到撒哈拉沙漠步行
110公里的舊事重提，更不介意將隨地小便的濕碎私事與觀眾分享。「我哋喺沙漠見到二三百個麻甩佬屙尿，喺度諗我自己都要屙尿
o架……我想請問呢度有冇人夠膽屙篤尿俾大家睇下……」隨即叫一位男觀眾示範，但對方冇表示。之後阿蘇忽然擘開大髀踎住咁講：「到凌晨終於忍唔到，我喺帳
幕走咗出嚟剝咗條褲，篤屎就二話不說瀨咗出嚟！」一輪屎尿屁爛 gag，終於聽到有零落的笑聲。

記者聽了近三十分鐘，以為阿蘇會切入正題教人賺錢，點知低處未算低，她竟然再將月事來襲搬出嚟，「行行下多咗個人，多咗邊個？多咗『姨媽』……我真係癲咗啦，因為我冇帶任何嘢招呼姨媽吖嘛……於是走去問法國佬有冇衞生巾，全個撒哈拉都知我經期到。」

阿蘇講到七情上面，但在場所有觀眾連同記者都一頭霸水，忍唔住你眼望我眼，如是者噏了近一個鐘的內容，竟然完全與賺兩億潛能冇關。臨完場時，她忍
唔住發晦氣話：「我哋空櫈多過籮柚就知啦！不過我同自己講，好嘢要堅持做落去，有一場得三個觀眾都要繼續講。」最後她又向在場僅有的觀眾推銷：「希望大家
可以同朋友講，聽我講好過聽嗰啲棟篤笑啦！」隨即就由女助手陪同下，走到觀眾席後排休息，等待下場 talk開始。

記者趁機上前問她有否對今次反應差失望，她直斥：「我一啲都唔鍾意喺香港講 talk，中國大陸嘅反應非常之犀利，香港人好得人驚，好似大把錢未開頭咁。」明顯抱怨香港人唔識欣賞佢。

事後記者問過幾位觀眾，不少人都覺得此 talk騷冇得着。一位王先生說：「入嚟聽佢吹水囉，都冇講點樣賺兩億嘅，叫做笑吓咁！」




Talk騷唔掂，其實阿蘇已封蝕本門，一早迹了六個贊助商包起全部 20場。除笨有精，她每場至少穩袋五位數酬勞。據知阿蘇連續兩次
talk騷反應強差人意，不少廣告商都對她極之失望，今次分分鐘是阿蘇告別作。不過，阿蘇仲有好計繼續搵水。嚟緊阿蘇又策劃另一個私人講座《蘇
Good面面談》，可單獨或最多 8人與阿蘇私下會面傾賺錢秘訣，今次收費驚人，齋噏三小時就收$24,000。記者問過阿蘇有關私人講座詳情，她說：「嗰個係真係講方法，似教你做生意咁，不過我未必接 o架，我都要了解咗你做咩嘢，我先知道你值唔值得俾呢嚿錢我囉！」佢講就咁大口氣，但觀乎今次 talk騷反應，即使佢收費 2千 4，觀眾都要諗過先！